धुळ्यात २०० कोटींच्या जमिनी घोटाळ्याचा आरोप; जिल्हाधिकाऱ्यांकडे चौकशीची मागणी

धुळ्यात २०० कोटींच्या जमिनी घोटाळ्याचा आरोप; जिल्हाधिकाऱ्यांकडे चौकशीची मागणी

बनावट कागदपत्रे, महसूल व आयकर विभागाची फसवणूक केल्याचा गंभीर आरोप; संबंधितांवर गुन्हा दाखल करण्याची मागणी

जनसंघर्ष न्यूज 

धुळे | प्रतिनिधी

धुळे शहरातील कथित २०० कोटी रुपयांच्या मौल्यवान जमिनीच्या व्यवहारात बनावट कागदपत्रांच्या आधारे शासनाची फसवणूक झाल्याचा गंभीर आरोप करत रफीक शाह गुलाब शाह यांनी जिल्हाधिकारी, धुळे यांच्याकडे लेखी तक्रार दाखल केली आहे. या प्रकरणात संबंधित जमीन, महसूल नोंदी, संमतीपत्र, अधिकारपत्र तसेच फेरफार प्रक्रियेची सखोल चौकशी करून दोषींवर कठोर कारवाई करण्याची मागणी करण्यात आली आहे.

तक्रारीनुसार, संबंधित व्यक्तीने बनावट दस्तऐवज तयार करून महसूल विभाग व आयकर विभागाची दिशाभूल केली असून, नियमबाह्य पद्धतीने जमिनीवरील हक्क मिळवून मोठा आर्थिक फायदा घेतल्याचा आरोप करण्यात आला आहे. तसेच या प्रकरणात काही महसूल अधिकाऱ्यांच्या भूमिकेचीही चौकशी करण्याची मागणी करण्यात आली आहे.

तक्रारदाराने यापूर्वीही विविध शासकीय कार्यालये व पोलिसांकडे निवेदने दिल्याचा दावा केला असून, अद्याप ठोस कारवाई न झाल्याचे तक्रारीत नमूद केले आहे. त्यामुळे संपूर्ण प्रकरणाची निष्पक्ष चौकशी करून बनावट कागदपत्रे तयार करणारे तसेच त्यांना सहकार्य करणाऱ्यांविरुद्ध भारतीय न्याय संहितेअंतर्गत गुन्हा दाखल करावा, अशी मागणी करण्यात आली आहे.

महात्मा गांधी राष्ट्रीय ग्रामीण रोजगार हमी योजनेअंतर्गत धुळे तालुक्यातील १३१ गावांची सामाजिक अंकेक्षण जन सुनावणी संपन्न

महात्मा गांधी राष्ट्रीय ग्रामीण रोजगार हमी योजनेअंतर्गत धुळे तालुक्यातील १३१ गावांची सामाजिक अंकेक्षण जन सुनावणी संपन्न 

जनसंघर्ष न्यूज 

धुळे - महाराष्ट्र शासन यांच्या , महाराष्ट्र राज्य सामाजिक अंकेक्षण व पारदर्शकता सोसायटी ( मंत्रालय,मुंबई ३२ ) यांच्यावतीने महात्मा गांधी राष्ट्रीय ग्रामीण रोजगार हमी योजना अंतर्गत २५ जून २०२६ रोजी सकाळी ठीक ११ वाजता पंचायत समिती सभागृह पं.स. धुळे जि. धुळे येथे वार्षिक जन सुनावणी सभा आयोजित करण्यात आली होती. 

          या जन सुनावणी सभेत धुळे तालुक्यातील १३१ गावातील नागरिकांच्या तक्रारी व समस्या समजून घेत सूचना ऐकून घेत त्यांना मार्गदर्शन करून त्यांच्या समस्यांचे निराकरण करून रोजगार हमी योजनेचे अंतर्गत झालेल्या कामांची पारदर्शकता आणि उत्तरदायित्व निश्चित करण्यासाठी सामाजिक अंकेक्षण अहवालाचे वाचन व चर्चा करण्यात आली.

        यावेळी या कार्यक्रमाचे प्रतिनिधित्व १) कपिलदेव चनेसर व्याले – जिल्हा साधन व्यक्ती (District Resource Person) ,२) उमाकांत गुलाबराव पाटील – अध्यक्ष (NGO प्रतिनिधी) ,३) ॲड. राहुल राजेंद्र निकुंभ – सदस्य (विधी / कायदेतज्ज्ञ) , ४) राकेश दिलीप पाटील – सदस्य (मजूर प्रतिनिधी) यांनी केले.

        या प्रसंगी संबंधित विभागाचे वरिष्ठ अधिकारी, शासकीय प्रतिनिधी, ग्रामसेवक आणि रोजगार सेवक हे देखील उपस्थित होते.

प्रेषित पैगंबरांबद्दल कथित आक्षेपार्ह वक्तव्य: नाजिया खानवर गुन्हा दाखल करण्यासाठी माजी आ. फारुक शहांचे पोलीस अधीक्षकांना निवेदन

प्रेषित पैगंबरांबद्दल कथित आक्षेपार्ह वक्तव्य 

 नाजिया खानवर गुन्हा दाखल करण्यासाठी माजी आ. फारुक शहांचे पोलीस अधीक्षकांना निवेदन.. 

जनसंघर्ष न्यूज 

धुळे - शहराचे माजी आमदार फारुक शाह यांच्या नेतृत्वाखालील एका शिष्टमंडळाने आज पोलीस अधीक्षक विशाल आनंद यांची भेट घेऊन त्यांना एक सविस्तर निवेदन दिले असून, या निवेदनात नाजिया खान या महिलेवर कठोर कायदेशीर कारवाई करण्याची मागणी करण्यात आली आहे. दिलेल्या निवेदनानुसार, नाजिया खान यांनी विविध सार्वजनिक कार्यक्रम आणि सोशल मीडियाच्या माध्यमातून मुस्लिम धर्माचे प्रेषित मोहम्मद पैगंबर साहेब यांच्याबाबत कथितरीत्या आक्षेपार्ह आणि अवमानकारक वक्तव्ये केल्याचा आरोप करण्यात आला आहे. अशा प्रकारच्या कथित प्रक्षोभक विधानांमुळे दोन समाजात वैमनस्य आणि तेढ निर्माण होऊन शहराची सार्वजनिक शांतता तसेच कायदा व सुव्यवस्थेचा प्रश्न निर्माण होऊ शकतो, अशी भीती व्यक्त करत या संपूर्ण प्रकरणाची आणि संबंधित व्हिडिओंची निष्पक्ष पोलीस चौकशी व्हावी, अशी मागणी करण्यात आली आहे. तसेच या चौकशीत तथ्य आढळल्यास नाजिया खान यांच्यावर तात्काळ गुन्हा दाखल करून कडक कारवाई करावी, अशी भूमिका माजी आमदार फारुक शहा यांनी मांडली आहे. हे निवेदन देताना त्यांच्यासोबत मतिन पठाण, सादिक शेख, तौफिक खाटीक, रफिक हाजी यांच्यासह अनेक आजी-माजी नगरसेवक आणि प्रमुख पदाधिकारी उपस्थित होते.

धुळे स्थानिक गुन्हे शाखेची मोठी कारवाई; गुंगीकारक औषधांचा १०.५१ लाखांचा मुद्देमाल जप्त

 

धुळे स्थानिक गुन्हे शाखेची मोठी कारवाई; गुंगीकारक औषधांचा १०.५१ लाखांचा मुद्देमाल जप्त

जनसंघर्ष न्यूज 

धुळे : गुंगीकारक औषधांच्या अवैध विक्रीवर आळा घालण्यासाठी धुळे स्थानिक गुन्हे शाखेने मोठी कारवाई करत १० लाख ५१ हजार २५० रुपयांचा मुद्देमाल जप्त केला आहे. या कारवाईत कोडीनयुक्त कफ सिरपच्या ४१० बाटल्या, एक इनोव्हा कार व मोबाईल फोन हस्तगत करण्यात आला आहे.

पोलीस अधीक्षक विशाल आनंद यांच्या मार्गदर्शनाखाली स्थानिक गुन्हे शाखेला मिळालेल्या गोपनीय माहितीनुसार मुंबई-आग्रा महामार्गावर सापळा रचण्यात आला. यावेळी गुजरात राज्यातील सुरत येथील रहिवासी एजाज रफीक शेख (वय २५) याच्या ताब्यातून मानवी मेंदूवर विपरीत परिणाम करणाऱ्या कोडीनयुक्त कफ सिरपच्या बाटल्या आढळून आल्या.

कारवाईदरम्यान REXTON-T आणि CANAX-T या ब्रँडच्या एकूण ४१० बाटल्या जप्त करण्यात आल्या. तसेच आरोपीकडील इनोव्हा कार (क्रमांक GJ-16/BB-2607) आणि मोबाईल फोनही ताब्यात घेण्यात आला. जप्त मुद्देमालाची एकूण किंमत १० लाख ५१ हजार २५० रुपये असल्याचे पोलिसांनी सांगितले.

या प्रकरणी धुळे शहर पोलीस ठाण्यात एनडीपीएस कायदा तसेच औषध व सौंदर्यप्रसाधने अधिनियमांतर्गत गुन्हा दाखल करण्यात आला आहे. पुढील तपासादरम्यान सुरत येथून आणखी दोन संशयितांना ताब्यात घेण्यात आले असून या अवैध साखळीचा उलगडा करण्यासाठी तपास सुरू आहे.

ही कारवाई पोलीस निरीक्षक ज्ञानेश्वर वारे, स्थानिक गुन्हे शाखेचे अधिकारी व कर्मचाऱ्यांच्या पथकाने यशस्वीरीत्या पार पाडली.

विरोधी पक्षनेते पदासाठी एमआयएम चा एल्गार; धुळ्यात धरणे आंदोलन करत प्रशासनाला दिला इशारा..

विरोधी पक्षनेते पदासाठी एमआयएम चा एल्गार; धुळ्यात धरणे आंदोलन करत प्रशासनाला दिला इशारा.. 

जनसंघर्ष न्यूज 

धुळे :- महानगरपालिकेतील राजकीय वातावरण एका हक्काच्या लढाईने चांगलेच तापले आहे. निवडणुकीचे निकाल लागून सहा महिने उलटले, तरी विरोधी पक्षनेते पद न मिळाल्याने अखेर एमआयएमने रस्त्यावर उतरून संघर्षाचा पवित्रा घेतला आहे. शहरातील क्यूमाईन क्लब परिसरात आज पक्षाचे नेते इर्शाद भाई जागीरदार यांच्या नेतृत्वाखाली सर्व नगरसेवक आणि शेकडो कार्यकर्ते धरणे आंदोलनात एकवटले. 'लोकशाहीत आमचा आवाज का दाबला जातोय?' असा सवाल करत, महानगरपालिकेत दुसऱ्या क्रमांकाचा पक्ष असूनही केवळ सत्ताधाऱ्यांच्या दबावामुळे प्रशासन जाणीवपूर्वक आमच्या हक्कावर गदा आणत आहे, अशी संतप्त भावना यावेळी आंदोलकांनी व्यक्त केली. त्यांच्या चेहऱ्यावर सहा महिन्यांची प्रतीक्षा आणि व्यवस्थेविरोधातील चीड स्पष्ट दिसत होती.

हे आंदोलन केवळ राजकीय नसून, तो कायद्याच्या चौकटीतील हक्क असल्याचा ठाम दावा एमआयएमने केला आहे. उच्च न्यायालयाच्या स्पष्ट निकालानुसार, हे पद कोणत्याही नव्या आघाडीला न देता संख्याबळानुसार दुसऱ्या क्रमांकावर असलेल्या पक्षालाच मिळायला हवे, असे त्यांचे म्हणणे आहे. या आंदोलनाच्या माध्यमातून प्रशासनाला येत्या १५ दिवसांचा अल्टिमेटम देण्यात आला आहे. या काळात पदाचा सन्मान न मिळाल्यास, हा लढा केवळ रस्त्यापुरता न ठेवता थेट उच्च न्यायालयात दाद मागून शहरात तीव्र मोर्चा काढण्याचा खणखणीत इशाराही पक्षाने दिला आहे. त्यामुळे आता या आंदोलनानंतर प्रशासन कायदेशीर मार्गाने काय पाऊल उचलते, याकडे संपूर्ण धुळे शहराचे लक्ष लागले आहे.

माहिती अधिकार नियम २०२६ लागू करून माहितीचा अधिकार कायद्याचा खून करणाऱ्यां विरोधात २५ जून रोजी आझाद मैदानावर माहिती अधिकार कार्यकर्ता महासंघाचे धरणे आंदोलन.

 माहिती अधिकार नियम २०२६ लागू करून माहितीचा अधिकार कायद्याचा खून करणाऱ्यां विरोधात 
२५ जून रोजी आझाद मैदानावर माहिती अधिकार कार्यकर्ता महासंघाचे धरणे आंदोलन.

जनसंघर्ष न्यूज 

        महाराष्ट्र शासनाने लागू केलेल्या माहिती अधिकार नियम २०२६ विरोधात राज्यभरात माहिती अधिकार कार्यकर्त्यांकडून तीव्र नाराजी व्यक्त करण्यात येत आहे. माहिती अधिकार अधिनियम २००५ च्या मूळ उदिष्ट्यांशी व तरतुदींशी हे नियम विसंगत असल्याचा आरोप करण्यात येत आहे. माहिती अधिकार कार्यकर्ता महासंघ (फेडरेशन) यांच्या मते माहितीचा अधिकार हा नागरिकांचा मुलभूत लोकशाही हक्क असून तो दया किवा सवलत नसून तो त्यांचा अधिकार आहे. त्यामुळे नव्याने लागू करण्यात आलेले नियम मागे घेऊन माहितीचा हक्क सुरक्षित करण्याची मागणी करण्यात आली आहे. नवीन नियमांमुळे माहिती मिळवण्याच्या प्रक्रियेत अनेक जाचक अडथळे निर्माण झाले आहेत. (अर्ज शुल्क १० वरून ३० रुपये, माहिती मिळवण्यासाठी पर पेज २ वरून ५ रुपये,) अर्ज शुल्क, अपील शुल्क, व प्रतिपादन शुल्कात वाढ, माहिती मागण्याचे कारण सांगण्याची सक्ती, तसेच नागरिकत्वाचा पुरावा जोडण्याच्या अटीवर आक्षेप घेण्यात आला आहे. या पार्श्वभूमीवर २५ जून २०२६ रोजी गुरुवारी सकाळी १०.०० ते ४.०० च्या वेळेत मुंबईतील आझाद मैदान येथे शांततापूर्ण आणि लोकशाही मार्गाने धरणे आंदोलन आयोजित करण्यात आले आहे. या आधी माहिती अधिकार कार्यकर्ता महासंघाच्या वतीने संपूर्ण राज्यातील पदाधिकारी सदस्य यांनी हजारो इमेल राष्ट्रपती, पंतप्रधान, राज्यपाल, मुख्यमंत्री, मुख्य सचिव, प्रधान सचिव सामान्य प्रशासन विभाग यांना मेल पाठवण्यात आलेले आहेत. तसेच प्रत्येक जिल्ह्यातील नेते, आमदार, खासदार यांना निवेदने दिली जात आहेत.

            या आंदोलनासाठी माहिती अधिकार कार्यकर्ता महासंघाचे (फेडरेशनचे) कार्यकर्ते मोठ्या संख्येने उपस्थित राहणार आहेत. तसेच या उपक्रमाला बळकटी देण्यासाठी समविचारी संस्था, संघटना, पत्रकार बांधव व नागरिकांनी ही मुख्यमंत्री व प्रधान सचिव सामान्य प्रशासन यांना मेल पाठवावेत. तसेच आझाद मैदान येथे होणारया आंदोलनात सहभागी व्हावे असे आवाहन माहिती अधिकार कार्यकर्ता महासंघाचे (फेडरेशनचे) संस्थापक अध्यक्ष सुभाषजी बसवेकर, राज्य उपाध्यक्ष शेखर कोलते, उत्तर महाराष्ट्र कार्याध्यक्ष महेश पाटील, राज्य कार्यकारणी सदस्य साहेबराव वाघ, किरण धुमाळ, यांनी केले आहे.

आमदार अनुप अग्रवाल यांच्या हस्ते सैनिक कॉलनी जलकुंभ व पंपिंग स्टेशनचे लोकार्पण संपन्न

 

आमदार अनुप अग्रवाल यांच्या हस्ते सैनिक कॉलनी जलकुंभ व पंपिंग स्टेशनचे लोकार्पण संपन्न

अमृत 2.0 योजना अंतर्गत नागरिकांना शुद्ध व सुरक्षित पाणीपुरवठ्यासाठी महत्त्वपूर्ण पाऊल

जनसंघर्ष न्यूज

     धुळे, दि. 20 जून — धुळे शहरातील पाणीपुरवठा व्यवस्था अधिक सक्षम व प्रभावी करण्याच्या दृष्टीने अमृत 2.0 योजनेअंतर्गत उभारण्यात आलेल्या सैनिक कॉलनी येथील जलकुंभ व पंपिंग स्टेशनचे लोकार्पण आज उत्साहपूर्ण वातावरणात संपन्न झाले.

     या कार्यक्रमाचे उद्घाटन आमदार धर्मयोद्धा अनुप भैय्या अग्रवाल यांच्या शुभहस्ते संपन्न झाले. यावेळी धुळे शहराच्या प्रथम नागरिक महापौर सौ. मायादेवी परदेशी तसेच धुळे महानगरपालिका आयुक्त नितीन कापडणीस यांची प्रमुख उपस्थिती लाभली. कार्यक्रमास नगरसेवक सुभाष सुकलाल जगताप, नगरसेवक ललित गंगाधर माळी, नगरसेविका सौ. उज्वला रंजीत भोसले व नगरसेविका सौ. योगिता संजय कुटे यांच्यासह नागरिक मोठ्या संख्येने उपस्थित होते.

     सैनिक कॉलनी येथील जलकुंभ अनेक वर्षांपासून उभारलेला असला तरी पंपिंग स्टेशनच्या अभावामुळे त्याचा पूर्ण क्षमतेने उपयोग होत नव्हता. पंपिंग स्टेशन उभारण्यासाठी लोकप्रतिनिधींकडून सातत्याने पाठपुरावा करण्यात आला. त्यानंतर हा प्रकल्प पूर्णत्वास येऊन आज नागरिकांच्या सेवेत दाखल झाला आहे.

     या जलकुंभामुळे प्रभाग क्रमांक १ मधील नगावबारी परिसर, कदमबांडे नगर, सैनिक कॉलनी, एकविरा पार्क, केसर पार्क तसेच झेंडा चौकापर्यंतच्या विविध कॉलनींना मोठा फायदा होणार आहे. यापूर्वी समान वितरण क्षेत्र असल्याने या उंच भागांमध्ये पाणी कमी दाबाने अथवा उशिराने पोहोचत होते. मात्र धुळे शहरातील सर्वात उंच ठिकाणी उभारलेल्या या जलकुंभामुळे आता संबंधित भागात एक दिवसाआड नियमित, मुबलक व विनाअडथळा पाणीपुरवठा करणे शक्य होणार आहे.

    यावेळी आमदार अनुप भैय्या अग्रवाल, महापौर मायादेवी परदेशी व आयुक्त नितीन कापडणीस यांनी अमृत 2.0 योजनेमुळे शहरातील पाणीपुरवठा व्यवस्थेत होत असलेल्या सुधारणांचा उल्लेख करत नागरिकांच्या मूलभूत सुविधांना प्राधान्य देण्याचा निर्धार व्यक्त केला.

      या प्रकल्पामुळे हजारो नागरिकांच्या पिण्याच्या पाण्याचा प्रश्न मोठ्या प्रमाणात मार्गी लागणार असून धुळे शहराच्या विकासाच्या दिशेने हे एक महत्त्वपूर्ण पाऊल ठरणार असल्याची भावना उपस्थितांनी व्यक्त केली.

धुळ्यात आंतरराष्ट्रीय योग दिन उत्साहात साजरा

 धुळ्यात आंतरराष्ट्रीय योग दिन उत्साहात साजरा

जनसंघर्ष न्यूज 

धुळे, प्रतिनिधी :-  शहरातील गरुड मैदान येथे आज (20 जून 2026) सर्वसमावेशक आंतरराष्ट्रीय योग दिन उत्साहपूर्ण वातावरणात साजरा करण्यात आला. या कार्यक्रमाला विविध क्षेत्रातील मान्यवर, लोकप्रतिनिधी, प्रशासकीय अधिकारी तसेच हजारो नागरिकांची उपस्थिती लाभली.

     कार्यक्रमाचे उद्घाटन दीपप्रज्वलन करून करण्यात आले. यावेळी धुळे विधानसभा मतदारसंघाचे आमदार अनुप अग्रवाल, धुळे ग्रामीणचे आमदार राम भदाणे, जिल्हाधिकारी भाग्यश्री विसपुते, जिल्हा पोलीस अधीक्षक विशाल आनंद यांच्यासह विविध मान्यवर उपस्थित होते.

     योग दिन संयोजन समितीच्या मार्गदर्शनाखाली आयोजित करण्यात आलेल्या या कार्यक्रमात सुमारे चार हजार नागरिक, विद्यार्थी, महिला तसेच शासकीय व खासगी संस्थांतील अधिकारी-कर्मचाऱ्यांनी मोठ्या उत्साहाने सहभाग नोंदविला. योगाभ्यासाद्वारे निरोगी जीवनशैलीचा संदेश देण्यात आला.

      उपस्थित मान्यवरांनी योगाचे महत्त्व अधोरेखित करत नागरिकांनी दैनंदिन जीवनात योगाचा अवलंब करावा, असे आवाहन केले. कार्यक्रमाचे संयोजक ओमप्रकाश खंडेलवाल यांनी प्रास्ताविक केले, तर योग प्रात्यक्षिकांचे संचालन डॉ. राजेंद्र निकुंभ यांनी केले.

      कार्यक्रमाच्या यशस्वी आयोजनासाठी संयोजन समितीच्या सदस्यांनी विशेष परिश्रम घेतले. कार्यक्रमानंतर उपस्थितांना अल्पोपहाराचे वाटप करण्यात आले.

लोकसेवकांशी हुज्जत घालणे पडलं महागात ; शासकीय कामात अडथळा आणला म्हणून पोलिसात गुन्हा दाखल

 लोकसेवकांशी हुज्जत घालणे पडलं महागात 

शासकीय कामात अडथळा आणला म्हणून पोलिसात गुन्हा दाखल 

चौघांपैकी तिघांना अटक एक फरार

जनसंघर्ष न्यूज 

     धुळे / साक्री (प्रतिनिधी): ग्रामीण रुग्णालयातील वैद्यकीय अधिकारी आणि कर्मचाऱ्यांना धमकावून, शासकीय कामात अडथळा निर्माण करणाऱ्या आणि पोलिसांवरच हल्ला करणाऱ्या चौघांपैकी तिघांना निजामपूर पोलिसांनी २४ तासांच्या आत अटक केली आहे. न्यायालयाने या आरोपींना ३ दिवसांची पोलीस कोठडी सुनावली असून, एक आरोपी अद्याप फरार आहे.

      मिळालेल्या माहितीनुसार, दिनांक १७ जून २०२६ रोजी रात्री १२:४५ वाजेच्या सुमारास जैताणे (ता. साक्री, जि. धुळे) येथील नवीन ग्रामीण रुग्णालयात ३ ते ४ इसम आले. त्यांनी तेथील वैद्यकीय अधिकारी श्रीमती मोनाली कोठावदे व नर्सिंग स्टाफ यांच्याशी विनाकारण वाद घालण्यास सुरुवात केली.

      घटनेची माहिती मिळताच निजामपूर पोलीस ठाण्याचे पथक तातडीने घटनास्थळी दाखल झाले. मात्र, आरोपींनी पोलिसांशीही हुज्जत घालत वादविवाद केला. एवढ्यावरच न थांबता त्यांनी पोलिसांना दमदाटी करत मारहाण केली.

      याप्रकरणी निजामपूर पोलीस ठाण्यात (१) सनी बोरसे, (२) दिपक जाधव, (३) शाम न्याहळदे आणि (४) बापू नानाभाऊ धनगर (सर्व रा. जैताणे, ता. साक्री) यांच्याविरुद्ध गु.र.नं. २०९/२०२६ BNS कलम १३२, १२१(१), ३(५) प्रमाणे शासकीय कामात अडथळा आणि मारहाणीचा गुन्हा दाखल करण्यात आला. गुन्हा दाखल झाल्याचे समजताच सर्व आरोपी फरार झाले होते.

       निजामपूर पोलीस ठाण्याचे प्रभारी अधिकारी सपोनि. मयुर भामरे यांनी तपासाची चक्रे जलद गतीने फिरवत तात्काळ एक विशेष पथक तयार केले. या पथकाने १८ जून २०२६ रोजी धाडसी कारवाई करत १. सनी त्र्यंबक बोरसे (रा. जैताणे) - याला चितोडरोड चौफुली, अजळकर नगर, धुळे येथून ताब्यात घेतले. , २. दिपक कैलास जाधव (रा. जैताणे) ,३. शाम छोटु न्याहळदे (रा. जैताणे ) या तिघांना अटक करून सन्माननीय न्यायालयात हजर केले असता, न्यायालयाने त्यांना ०३ दिवसांची पोलीस कोठडी रिमांड मंजूर केली आहे. या गुन्ह्यातील चौथा फरार आरोपी बापू नानाभाऊ धनगर याचा पोलीस कसून शोध घेत आहेत.

कायद्याची तरतूद - 

लोकसेवकाला त्याचे कर्तव्य पार पाडण्यापासून धाकाने परावृत्त करण्यासाठी हल्ला करणे किंवा फौजदारीपात्र बलप्रयोग केल्यास, दोन वर्षांचा कारावास किंवा द्रव्यदंड (दंड) किंवा दोन्ही शिक्षांची तरतूद कायद्यात आहे.

या पथकाने केली कारवाई-

सदर उल्लेखनीय कामगिरी पोलीस अधीक्षक धुळे श्री. विशाल आनंद, अप्पर पोलीस अधीक्षक अजय देवरे, उपविभागीय पोलीस अधिकारी श्री. संजय बांबळे यांच्या मार्गदर्शनाखाली निजामपूर पोलीस ठाण्याचे प्रभारी अधिकारी सपोनि. मयुर भामरे, सपोनि. प्रियदर्शनी थोरात, पोउनि. मधुकर सोमोसे आणि पोलीस अंमलदार प्रदिपकुमार आखाडे, नारायण माळचे, रतन मोरे, सुजित देवरे, राकेश महाले, टिलु पावरा, गौतम अहिरे व वारलवाड यांनी केली आहे. मामलेदार पोलीस अधिक तपास करत आहेत.

श्री गुरु अर्जन देव महाराज यांच्या पावन शहिदी गुरु पर्वा निमित्त गुरुद्वारात विविध कार्यक्रम संपन्न.

श्री गुरु अर्जन देव महाराज यांच्या पावन शहिदी गुरु पर्वा निमित्त गुरुद्वारात विविध कार्यक्रम संपन्न...

जनसंघर्ष न्यूज

धुळे :-  श्री गुरु अर्जन देव जी महाराज यांच्या पावन शहीदी गुरुपर्वानिमित्त धुळे येथील गुरुद्वारा श्री गुरु नानक साहिब जी येथे विविध सामाजिक व धार्मिक उपक्रमांचे आयोजन करण्यात आले. यानिमित्त वरद रक्त केंद्र, धुळे यांच्या सहकार्याने भव्य रक्तदान शिबिर पार पडले.

या रक्तदान शिबिराला शीख समाज बांधवांसह विविध समाजातील नागरिकांनी उत्स्फूर्त प्रतिसाद देत मोठ्या संख्येने रक्तदान केले. रक्तदानाच्या माध्यमातून अनेक गरजू रुग्णांना जीवनदान देण्याचा संदेश या उपक्रमातून देण्यात आला.

यासोबतच भाविकांसाठी शरबत वाटप करण्यात आले तसेच २४ तास अखंड गुरु दा लंगर आयोजित करण्यात आला होता. लंगरमध्ये भाविकांनी मोठ्या संख्येने सहभागी होत प्रसादाचा लाभ घेतला. संपूर्ण परिसरात भक्तीमय आणि सेवाभावी वातावरण निर्माण झाले होते.

या प्रसंगी अनेक शीख समाज बांधवांनी गुरुद्वारा श्री गुरु नानक साहिब जी येथे भेट देऊन गुरु अर्जन देव जी महाराज यांच्या शहादतीस अभिवादन केले. समाजसेवा, मानवता आणि बंधुभावाचा संदेश देणाऱ्या या कार्यक्रमाला उत्स्फूर्त प्रतिसाद मिळाला.

यासंदर्भात माहिती देताना धुळे गुरुद्वाराचे प्रमुख बाबा दारा सिंग यांनी सांगितले की, गुरु अर्जन देव जी महाराज यांनी मानवतेसाठी दिलेले बलिदान हे संपूर्ण समाजासाठी प्रेरणादायी आहे. त्यांच्या स्मरणार्थ रक्तदान, शरबत सेवा आणि गुरु दा लंगर यांसारखे उपक्रम राबवून समाजसेवेचा संदेश देण्याचा प्रयत्न करण्यात आला आहे.

गुरु अर्जन देव जी महाराज यांच्या शहीदी गुरुपर्वानिमित्त आयोजित या उपक्रमातून "मानव सेवा हीच खरी ईश्वर सेवा" हा संदेश पुन्हा एकदा अधोरेखित झाला.

मनपा अधिकाऱ्यांकडून कारवाईस टाळाटाळ; तक्रारदाराचा आत्मदहनाचा प्रयत्न, उपायुक्तांच्या आश्वासनानंतर माघार

मनपा अधिकाऱ्यांकडून कारवाईस टाळाटाळ; तक्रारदाराचा आत्मदहनाचा प्रयत्न ; उपायुक्तांच्या आश्वासनानंतर माघार

जनसंघर्ष न्यूज 

​         धुळे - शहरातील वीर सावरकर मार्ग, रमाबाई आंबेडकर नगर येथील एका गल्लीत बेकायदेशीर बांधकाम करून रस्ता बंद केल्याप्रकरणी स्थानिक रहिवासी नितीन शिंदे हे वर्षभरापासून मनपाकडे दाद मागत आहेत. आयुक्तांनी कारवाईचे आदेश देऊनही, अतिक्रमण विभागाचे अधिकारी प्रसाद जाधव, हेमंत पावटे आणि मोनीष पाटील यांनी कारवाई न करता राजकीय दबावाखाली अतिक्रमणधारकाला पाठीशी घातल्याचा आरोप आहे. एवढेच नव्हे तर, पैशांची मागणी पूर्ण न केल्याने अधिकाऱ्यांनी तक्रारदार शिंदे यांनाच त्यांचे घर पाडण्याची धमकी दिली आहे, ज्यामुळे प्रशासनाचा भोंगळ कारभार चव्हाट्यावर आला आहे.

​१६ तारखेला कारवाई न झाल्याने निराश झालेल्या नितीन शिंदे यांनी आज मनपा प्रशासनाला पूर्वकल्पना देऊन आत्मदहन करण्याचा इशारा दिला होता. त्यानुसार ते टोकाचे पाऊल उचलण्यासाठी आले असता, मनपा उपायुक्तांनी मध्यस्थी करत त्यांची समजूत काढली. "आम्ही तुम्हाला कायदेशीर न्याय देऊ, असे कोणतेही चुकीचे पाऊल उचलू नका," असे ठोस आश्वासन उपायुक्तांनी दिल्यानंतर शिंदे यांनी प्रशासनाचा मान राखत आपला आत्मदहनाचा निर्णय मागे घेतला आहे. आता प्रशासन खरोखरच योग्य ती कायदेशीर कारवाई करून न्याय देणार का, याकडे सर्वांचे लक्ष लागून आहे.

२.५ कोटींच्या नालेसफाई कामात महानगर पालिका आयुक्त पार्टनर भ्रष्टाचाराची चौकशी विभागीय समिती मार्फत करा शिवसेना उभाता पदाधिकाऱ्यांची मंत्रालयात नगर विकास राज्यमंत्र्यांकडे कारवाईचे मागणी

 २.५ कोटींच्या नालेसफाई कामात महानगर पालिका आयुक्त पार्टनर

भ्रष्टाचाराची चौकशी विभागीय समिती मार्फत करा 

शिवसेना उभाता पदाधिकाऱ्यांची मंत्रालयात नगर विकास राज्यमंत्र्यांकडे कारवाईचे मागणी

जनसंघर्ष न्यूज 

धुळे -  धुळे महानगरपालिका नालेसफाईतील भ्रष्टाचार संदर्भात आम्ही हे तिसरे पत्र वजा निवेदन आपणा स्वतःला मंत्रालयात भेटून देत असून यापूर्वीच्या तक्रारीची दखल घेवून आपण दि. 12/5/2026च्या पत्रान्वये आयुक्तांना सदर भ्रष्टाचार व गंभीर  अनियमिततेच्या संदर्भात चौकशी करुन तक्रारदारांना परस्पर कळविण्यात यावे, असे आदेश दिले आहेत.

आमची तक्रारच मुळात आयुक्तांविरुध्द आहे. कुंपणच शेत खात आहे. धुळ्याची कचरासफाई 2024 सालापर्यंत 25 लाख रु.त होत असतांना सन 2025साली 55 लाखाचे नालेसफाईचे टेंडर

 निघाले. नालेसफाई 10-20% देखील होत नव्हती. नालेसफाई हा महानगरपालिकेच्या तिजोरीवर डाका घालण्याचा प्रकार आहे. सन 2025 साली 55 लाखाचे टेंडर निघाले... नालेसफाई न करता 55 लाख हडप केले. तोंडाला रक्त लागल्याने यावर्षी प्रथम 1.49 कोटीचे टेंडर निघाले.  परंतु चार नगरसेवकांना हे टेंडर घ्यावयाचे असल्याने समर्थ कन्स्ट्रक्शन यांची निविदा सर्वांत कमी दराची आल्याने, त्यांची पंचायत झाली. या ठेकेदारास मॅनेज करु न शकल्याने सत्ताधारी पक्षाच्या नगरसेवकांनी आयुक्तांना हाताशी धरुन निविदा रद्द करण्यास भाग पाडले. निविदा रद्द करण्याचे कारण मुळीच संयुक्तीक व कायदेशीर नाही. निविदा का रद्द केली ? सर्वांत आधी या निविदा रद्द करण्याची अनियमितता व आयुक्तांनी केलेल्या अधिकाराचा दुरुपयोगाची चौकशी आवश्यक आहे.

फेरनिविदा काढण्याचे आदेश आयुक्तांनी दिले. तेव्हा त्याच रकमेची निविदा प्रसिध्द करणे कायद्याला धरुन होते. मात्र या ठेक्यात स्वत:ला 20% पार्टनर करुन घेतले. ते चार नगरसेवक व आयुक्त असे 5 जण या नालेसफाईच्या कामात पार्टनर आहे. ही चर्चा शहरात खुलेआम होतेय. आयुक्त पार्टनर झाल्याने त्यांना सदरची 1.49 कोटीची निविदा थेट 2.49 कोटी काढावी लागली.

फेरनिविदा काढावयाची असतांना रकमेत बदल अर्थात 2.49 कोटीचे टेंडर फक्त आयुक्त पार्टनर झाल्यामुळेच काढावी लागते, जे मुळात बेकायदेशीर होय. ही दुसरी गंभीर अनियमितता आहे.

शिवाय शहरात तेच 7 मुख्य नाले व 12 उपनाले असतांना लांबी, रुंदी, खोली तेवढीच असतांना फेरनिविदेमध्ये 1 कोटी रुपयाची वाढ कशी होवू शकते ?

4 सत्ताधारी पक्षाचे नगरसेवक व आयुक्तच या कामात पार्टनर असल्याने, आम्ही यापूर्वी केलेल्या तक्रारीची दखल घेणे शक्यच नव्हते. उलट गेल्या 2-3 दिवसांपासून वृत्तपत्रांना 80% नालेसफाई झाली अशी खोटी माहिती देवून नागरिकांची व शासनाची फसवणूक करत आहेत. वृत्तपत्रांनी 80% नालेसफाईवर प्रश्‍नचिन्ह निर्माण केले.

म्हणून आम्ही सर्व पदाधिकारी पहाणीला गेलो असता,मोतीनाला व सुशी नाला येथील पुलाजवळ थोडीफार सफाई करुन म्हणजे 500 मीटर देखील सफाई झालेली नाही. हे नाले 4-5 किमी लांबीचे आहेत. दैठणकर नगर, सिस्टेल क्लासेस, सिव्हील हॉस्पिटल, संघमा चौक, सिंचन भवन मागील नाला, जीटीपी कॉलनी नाला पूर्ण कचरा, मेलेले जनावरे पडलेले आढळले. तेथील नागरिकांनी इकडे कधीही नालेसफाई झाली नाही असे सांगितले. हे सर्व पुरावे, फोटो, व्हीडीओ आम्ही चौकशी दरम्यान सादर करु शकतो. इतर जे 11-12 उपनाले आहेत, त्याकडे हे लोक फिरकले देखील नाहीत. 49 कि.मी. चे नालेसफाईचे इस्टीमेट असतांना 4-5 किमी.ची नालेसफाई देखील झाली कि नाही ही शंकाच आहे.

ज्या ठिकाणी नालेसफाई म्हणजे थातुर-मातुर घाण, गाळ काढून नाल्यालगतच ढिगारे 15 दिवसांपासून पडून आहेत, ते उचलले जाणार नाहीत. पाऊस पडला म्हणजे ती सर्व घाण पुन्हा नाल्यात जमा होईल !

आमची नम्र विनंती आहे, अत्यंत जलद गतीने नाले सफाई कामाच्या चौकशीसाठी तज्ञ लोकांची समिती नेमून सर्वप्रथम फुगीर इस्टीमेट 2.49 कोटीचे ऑडीट करावे. इस्टीमेट मधील तरतूदी, वाहने, मशीन, साहित्य न वापरता फक्त जेसीबी मशीनने कचरा नाल्याच्या बाजुलाच ढकलण्यात आला आहे. नाल्याचे खोलीकरण तसेच रुंदीकरण न करता थातुर-मातुर व तकलादू काम ते देखील 15-20% पेक्षा जास्त नसेल ! इतकी लूट दिवसा-ढवळया होत आहे. किती टन गाळ, घाण काढणे अपेक्षित होते. नियमानुसार (डीएसआर) दर, निघालेला कचरा यांचे परिक्षण करावे. विभागीय चौकशी समिती नेमण्यात यावी.

आयुक्तांनी केलेल्या टेंडर भ्रष्टाचाराची चौकशी करावी. स्वत:च पार्टनर असल्याने काम न करताच बिले काढणे सोयीचे व्हावे म्हणून 80% नालेसफाईची बोंब मारणार्‍या आयुक्तांना बडतर्फ करावे, हे भ्रष्ट अधिकारी आहेत. यांचे पूर्वीचे रेकॉर्ड चांगले नसून हे अनेकदा अ‍ॅण्टीकरप्शन विभागामार्फत ट्रॅप झाले आहेत. म्हणून आपल्या स्तरावरुन नालेसफाईच्या कामातील भ्रष्टाचाराची चौकशी करावी, अशी मागणी शिवसेना उपनेते सौ.शुंभांगी पाटील जिल्हा प्रमुख अतुल सोनवणे उपजिल्हाप्रमुख नरेंद्र परदेशी यांनी थेट मंत्रालयात नगरविकास राज्यमंत्री श्रीमती माधुरी मिसाळ, अप्पर सचिव नगरविकास यांना प्रत्यक्ष भेट घेऊन केली, या संदर्भातील तब्बल १२१  रंगित गुगल मॅप छायाचित्रे व चलचित्र फिती देखील पुरावा म्हणून सादर करण्यात आल्या,या संदर्भात लवकरच योग्य ती कार्यवाही करण्यात येईल असे आश्वासन नगरविकास राज्यमंत्री यांनी शिवसेना पदाधिकारी यांना दिले.

जात वैधता प्रमाणपत्राच्या प्रलंबित परिपत्रकासाठी धुळ्यात कोळी महासंघाचे आंदोलन; जिल्हाधिकाऱ्यांना निवेदन

जात वैधता प्रमाणपत्राच्या प्रलंबित परिपत्रकासाठी धुळ्यात कोळी महासंघाचे आंदोलन ; जिल्हाधिकाऱ्यांना निवेदन

जनसंघर्ष न्यूज 

​धुळे :- अनुसूचित जमातीतील बांधवांना आणि त्यांच्या रक्तनात्यातील व्यक्तींना जातीचे दाखले व जात वैधता प्रमाणपत्र सुलभरीत्या मिळण्याबाबत राज्य शासनाचे प्रलंबित परिपत्रक तत्काळ काढण्यात यावे, या मागणीसाठी कोळी महासंघाच्या वतीने आज धुळे जिल्हाधिकारी कार्यालयाबाहेर तीव्र निदर्शने करण्यात आली. गेल्या अनेक वर्षांपासून प्रलंबित असलेल्या कोळी समाजाच्या या महत्त्वपूर्ण प्रश्नावर शासनाचे लक्ष वेधण्यासाठी संघटनेच्या वतीने धुळे जिल्हा प्रशासनाला अधिकृत स्मरणपत्र देण्यात आले. या प्रलंबित परिपत्रकाबाबत जिल्हा प्रशासनाने राज्य शासनाकडे तातडीने व सकारात्मक पाठपुरावा करावा, अशी आग्रही मागणी या आंदोलनाद्वारे करण्यात आली.

​या संदर्भात २० ऑक्टोबर २०२३ रोजी तत्कालीन मुख्यमंत्र्यांच्या अध्यक्षतेखाली झालेल्या उच्चस्तरीय बैठकीत सकारात्मक निर्णय घेण्यात आला होता. मात्र, त्यानंतर लागलेल्या विविध निवडणुका आणि आचारसंहितेचे कारण पुढे करत प्रशासनाकडून हे परिपत्रक जारी करण्यास कमालीची दिरंगाई झाली आहे. या प्रशासकीय उदासीनतेमुळे संपूर्ण कोळी समाजात तीव्र नाराजी आणि संतापाचे वातावरण आहे. शासनाने आता कोणतीही टाळाटाळ न करता हे परिपत्रक तात्काळ जारी करून कोळी बांधवांना न्याय द्यावा, अन्यथा आगामी काळात आंदोलन अधिक तीव्र करण्याचा इशारा कोळी महासंघाने दिला आहे.

आरटीओ कर्मचाऱ्यांचा एल्गार राज्यात आरटीओ सेवा ठप्प....

आरटीओ कर्मचारी संघटनेची आक्रमक भूमिका 

प्रलंबित मागण्यांबाबत शासन प्रशासनाची टोलवाटोलवी
आरटीओ कर्मचाऱ्यांचा एल्गार राज्यात आरटीओ सेवा ठप्प....

जनसंघर्ष न्यूज 

   धुळे :-  आकृतीबंध मंजूर होऊन साडेतीन वर्षे झाली तरी सेवा प्रवेश नियम तयार नाहीत. त्यामुळे कर्मचाऱ्यांना पदोन्नती पासून वंचित ठेवले जात असून त्यांचे आर्थिक व सामाजिक नुकसान होत आहे. असे अनेक प्रलंबित प्रश्न सोडविण्यास शासन  प्रशासन  टाळाटाळ करत असल्याची संतप्त भावना राज्यातील आरटीओ कर्मचाऱ्यांमध्ये आहेत. त्यामुळे मंगळावर दिनांक १६ जूनपासून आरटीओ कर्मचाऱ्यांनी बेमुदत संपाचा एल्गार केला आहे. 

     कर्मचाऱ्यांच्या बहुतांशी मागण्या  प्रशासन स्तरावर सुटू शकतात. त्यासाठी संघटनेने सप्रमाण पाठपुरावा केला असला तरी  मार्गदर्शनाच्या नावाखाली या मागणीबाबतचे प्रस्ताव शासनाकडे पाठवून प्रशासन वेळ खाऊ धोरण राबवीत आहे, असा आरोप संघटनेने केला आहे.  

     संघटनेने दिलेल्या आंदोलनाच्या नोटीसनंतर  परिवहन मंत्री मा. प्रताप सरनाईक यांनी दहा दिवसांपूर्वी बैठक बोलावली होती. पण त्याचे इतिवृत देण्यासही टाळाटाळ केली जात आहे. प्रशासनाचा हलगर्जीपणा चालढकलपणा त्यातून स्पष्ट होत आहे. प्रशासनाच्या या भूमिकेमुळे राज्यातील सर्व आरटीओ कर्मचारी प्रचंड संतप्त झालेले आहेत. 

     या सर्व बाबींचा विचार करून संपाविषयीचा अंतिम निर्णय घेण्यासाठी शनिवार दिनांक १३ रोजी झालेल्या संघटनेच्या तातडीच्या बैठकीमध्ये सखोल चर्चा झाली. तेव्हा बेमुदत संपाशिवाय पर्याय नाही अशा तीव्र भावना सर्व पदाधिकारी आणि सक्रिय कार्यकर्त्यांनी व्यक्त केल्या. त्यानुसार दिनांक १६ जून पासून संपूर्ण राज्यामध्ये आरटीओ कर्मचारी संपावर जाऊन आपला रोष व्यक्त  करणार आहेत. त्यामुळे मंगळावर पासून राज्यभरात आरटीओ कार्यालये ठप्प होणार आहेत.  

     शासन प्रशासनाने प्रलंबित मागण्यांबाबत त्वरित सकारात्मक निर्णय घ्यावेत. अन्यथा कर्मचारी आता माघार घेणार नाहीत, अशी ठाम भूमिका संघटनेचे सरचिटणीस सुरेंद्र सरतापे यांनी व्यक्त केली आहे.

     यावेळी रवि बैसाणे महाराष्ट्र राज्य उपाध्यक्ष तथा खान्देश विभागीय अध्यक्ष, महाराष्ट्र मोटार वाहन RTO कर्मचारी संघटना.म.रा. , संतोष मानकर अध्यक्ष प्रादेशिक परिवहन कार्यालय धुळे ,राकेश पवार सचिव प्रादेशिक परिवहन कार्यालय धुळे , सचिन सानप,संघटक प्रापका धुळे ,संगीता वाघ, संघटक प्रापका धुळे सह सन्माननीय सदस्य - राजेश वानखेडे, ईफ्तेखार शाह, कृष्णा दातार, जितेंद्र बोरसे, किर्ती वडगे, योगिता विसपुते , गायत्री पाटील,  सोनाली घाटगे, प्राजक्ता वाणी आदि उपस्थित होते.

 

इलेक्ट्रिक पाण्याची मोटार चोरी प्रकरणाचा उलगडा; धुळे तालुका पोलिसांची कारवाई

 

इलेक्ट्रिक पाण्याची मोटार चोरी प्रकरणाचा उलगडा ; धुळे तालुका पोलिसांची कारवाई

एक आरोपी जेरबंद, ३२ हजार रुपयांचा मुद्देमाल हस्तगत

जनसंघर्ष न्यूज 

धुळे - तालुका पोलिसांनी इलेक्ट्रिक पाण्याची मोटार चोरी प्रकरणाचा यशस्वी उलगडा करत एका आरोपीला अटक केली असून त्याच्याकडून सुमारे ३२ हजार रुपयांचा मुद्देमाल जप्त करण्यात आला आहे.

पोलिसांनी दिलेल्या माहितीनुसार, दिनांक २८ मे २०२६ रोजी कुसुंबा शिवारातील जानाबारा धरण परिसरात शेतकरी बल्लभ काशिनाथ माळचे (रा. मेहेरगाव, ता. जि. धुळे) यांच्या शेतातील इलेक्ट्रिक पाण्याची मोटार अज्ञात चोरट्यांनी चोरून नेली होती. याप्रकरणी धुळे तालुका पोलीस ठाण्यात गुन्हा क्रमांक ३१४/२०२६, कलम ३०३(२) बीएनएस अंतर्गत गुन्हा दाखल करण्यात आला होता.

घटनेचे गांभीर्य लक्षात घेऊन पोलीस निरीक्षक धनंजय पाटील यांच्या मार्गदर्शनाखाली तपास पथकाने गुप्त माहितीच्या आधारे संशयित दिपक नाना मोरे (वय २०, रा. बलानो, ता. जि. धुळे) यास ताब्यात घेतले. चौकशीदरम्यान आरोपीने गुन्ह्याची कबुली दिल्यानंतर चोरीस गेलेला मुद्देमाल जप्त करण्यात आला.

जप्त करण्यात आलेल्या मुद्देमालामध्ये ५ एचपीची जलपरी पाण्याची मोटार, आणखी एक पाण्याची मोटार तसेच स्प्लेंडर मोटारसायकलचा समावेश असून एकूण ३२ हजार रुपयांचा ऐवज हस्तगत करण्यात आला आहे.

ही कारवाई पोलीस अधीक्षक विशाल आनंद, अपर पोलीस अधीक्षक अजय देवरे आणि उपविभागीय पोलीस अधिकारी संजय बांदे यांच्या मार्गदर्शनाखाली पोलीस निरीक्षक धनंजय पाटील तसेच पथकातील अधिकारी व कर्मचाऱ्यांनी केली.

परळी युवक हत्या प्रकरण फास्ट ट्रॅक न्यायालयात चालवा - जनकल्याण मानवता मिशनच्या वतीने मागणी जनसंघर्ष न्यूज

 परळी युवक हत्या प्रकरण फास्ट ट्रॅक न्यायालयात चालवा 

जनकल्याण मानवता मिशनच्या वतीने मागणी

जनसंघर्ष न्यूज 

परळी वैजनाथ, प्रतिनिधी : परळी वैजनाथ येथील युवक तोहिद केरातोवाण पगण यांच्या हत्या प्रकरणातील आरोपींवर कठोर कारवाई करून हे प्रकरण फास्ट ट्रॅक न्यायालयात चालविण्यात यावे, अशी मागणी जनकल्याण मानवता मिशनच्या वतीने करण्यात आली आहे.

यासंदर्भात महाराष्ट्राचे मुख्यमंत्री तथा गृहमंत्री देवेंद्र फडणवीस यांना निवेदन देण्यात आले असून संस्थापक अध्यक्ष फिरोज गफ्फार शेख यांनी ही मागणी केली आहे.

निवेदनात म्हटले आहे की, तोहिद केरातोवाण पगण यांची निर्घृण हत्या करून त्यांचा मृतदेह रेल्वेमार्गावर फेकून देण्यात आल्याची घटना समोर आली आहे. या घटनेमुळे परिसरात संतापाचे वातावरण निर्माण झाले असून नागरिकांमध्ये भीती व अस्वस्थता पसरली आहे.

या प्रकरणाची निष्पक्ष, सखोल व जलद चौकशी करून सर्व आरोपींना तात्काळ अटक करण्यात यावी. तसेच हत्येमागील संपूर्ण कट, कारणे व संबंधित बाबींचा तपास करून दोषींवर कठोरात कठोर कारवाई करावी, अशी मागणी निवेदनातून करण्यात आली आहे.

पीडित कुटुंबाला लवकर न्याय मिळण्यासाठी हे प्रकरण फास्ट ट्रॅक न्यायालयात चालवावे तसेच पीडित कुटुंबास आवश्यक संरक्षण व मदत उपलब्ध करून द्यावी, असेही निवेदनात नमूद करण्यात आले आहे.

या निवेदनाच्या प्रती पोलीस महासंचालक, पोलीस महानिरीक्षक, जिल्हाधिकारी व पोलीस अधीक्षक यांनाही पाठविण्यात आल्या आहेत.

अतिक्रमणावर कारवाई करा, अन्यथा १७ जूनला आत्मदहन; नितीन शिंदे यांचा जिल्हा प्रशासनाला अल्टिमेटम

 

अतिक्रमणावर कारवाई करा, अन्यथा १७ जूनला आत्मदहन; नितीन शिंदे यांचा जिल्हा प्रशासनाला अल्टिमेटम

जनसंघर्ष न्यूज 

वृत्त प्रतिनिधी : धनंजय गाळणकर

धुळे : शहरातील रमाबाई आंबेडकर नगर परिसरातील सार्वजनिक वहिवाटीच्या जागेवरील कथित बेकायदेशीर अतिक्रमण हटविण्यासाठी वारंवार तक्रारी, अर्ज आणि निवेदने देऊनही प्रशासनाकडून कोणतीही ठोस कारवाई होत नसल्याने संतप्त झालेल्या अर्जदार नितीन सुभाष शिंदे व परिसरातील नागरिकांनी धुळे जिल्हाधिकारी, जिल्हा पोलीस अधीक्षक तसेच धुळे महानगरपालिका आयुक्त यांना निवेदन देत १६ जूनपर्यंत कारवाई न झाल्यास १७ जून रोजी आत्मदहन करण्याचा इशारा दिला आहे. निवेदनानुसार, रमाबाई आंबेडकर नगरातील एका सार्वजनिक बोळातील वहिवाटीच्या जागेवर कथित अतिक्रमण करून रस्ता बंद करण्यात आला आहे. त्यामुळे नागरिकांच्या दैनंदिन हालचालींवर परिणाम होत असून महिला, ज्येष्ठ नागरिक व विद्यार्थ्यांना मोठ्या अडचणींचा सामना करावा लागत आहे. याबाबत गेल्या अनेक महिन्यांपासून प्रशासनाकडे सातत्याने पाठपुरावा करण्यात येत आहे. विशेष म्हणजे, महानगरपालिकेच्या अधिकाऱ्यांनी प्रत्यक्ष पाहणी, पंचनामा, मोजमाप आणि मार्किंग यांसारख्या सर्व प्रशासकीय प्रक्रिया पूर्ण केल्या आहेत. तसेच संबंधित प्रकरणात कारवाई करण्याबाबत प्रशासनाकडून सकारात्मक शेराही देण्यात आला होता. मात्र, सर्व प्रक्रिया पूर्ण होऊनही प्रत्यक्ष अतिक्रमण हटविण्याची कारवाई अद्याप झालेली नसल्याचा आरोप निवेदनात करण्यात आला आहे. नितीन शिंदे यांनी निवेदनात म्हटले आहे की, २१ मे रोजी कारवाईसाठी पोलीस बंदोबस्त उपलब्ध असतानाही अतिक्रमण हटविण्यात आले नाही. त्यामुळे संबंधित विभागातील काही अधिकारी जाणीवपूर्वक कारवाई टाळत असल्याचा संशय नागरिकांमध्ये बळावत आहे. वारंवार वरिष्ठ अधिकाऱ्यांच्या आदेशानंतरही कारवाई होत नसल्याने प्रशासनाच्या कार्यपद्धतीवर प्रश्नचिन्ह निर्माण झाले असल्याचेही त्यांनी नमूद केले आहे. "वारंवार तक्रारी करूनही न्याय मिळत नसल्याने आम्ही अत्यंत निराश झालो आहोत. प्रशासनाच्या उदासीन भूमिकेमुळे नागरिकांना मानसिक, सामाजिक व आर्थिक त्रास सहन करावा लागत आहे. त्यामुळे आता टोकाचा निर्णय घेण्याची वेळ आली आहे," असे नितीन शिंदे यांनी निवेदनात म्हटले आहे. दरम्यान, १६ जून २०२६ पर्यंत संबंधित अतिक्रमण हटविण्याची कारवाई न झाल्यास १७ जून रोजी सकाळी ११.३० वाजता धुळे महानगरपालिका आयुक्तांच्या दालनाबाहेर आत्मदहन करण्यात येईल, असा इशारा निवेदनाद्वारे देण्यात आला आहे. या घटनेस जिल्हा प्रशासन, पोलीस प्रशासन आणि महानगरपालिका प्रशासन जबाबदार राहील, असेही निवेदनात स्पष्ट करण्यात आले आहे. आत्मदहनाच्या इशाऱ्यानंतर प्रशासन तातडीने हालचाल करून अतिक्रमणाविरोधात कारवाई करणार का, याकडे आता धुळेकरांचे लक्ष लागले आहे.

धुळ्यात माजी सैनिक आणि जवानांची घर बांधणीत फसवणूक; निकृष्ट बांधकाम करून धमकावणाऱ्या ठेकेदारांवर कारवाईची मागणी

धुळ्यात माजी सैनिक आणि जवानांची घर बांधणीत फसवणूक ; निकृष्ट बांधकाम करून धमकावणाऱ्या ठेकेदारांवर कारवाईची मागणी

जनसंघर्ष न्यूज 

धुळे - शहरातील रामनगरासह परिसरातील माजी सैनिक व जवानांची घर बांधणीच्या नावाखाली लाखो रुपयांची फसवणूक झाल्याचा धक्कादायक प्रकार समोर आला आहे. बीएसएफ जवान विनोद बोरसे आणि माजी सैनिक कृष्णा शिंदे यांच्यासह अनेक नागरिकांनी ठेकेदारांवर निकृष्ट दर्जाचे बांधकाम केल्याचा आरोप केला आहे. निवेदनानुसार, महेश पाटील, निशांत पाटील, संदीप पाटील आणि इतर संबंधित ठेकेदारांनी करारानुसार लाखो रुपये घेऊनही अत्यंत दुय्यम दर्जाचे साहित्य वापरले. यामुळे घरांना अवघ्या काही महिन्यांतच भेगा पडणे, गळती सुरू होणे आणि प्लास्टर निखळणे असे प्रकार घडले असून, घरांचे मोठे नुकसान झाले आहे.

बँकेकडून ३० लाखांपर्यंतचे कर्ज काढून आणि आयुष्यभराची पुंजी पणाला लावून घरे बांधणाऱ्या या जवानांनी न्याय मिळवण्यासाठी आता धुळे पोलीस अधीक्षकांकडे धाव घेतली आहे. या सदोष बांधकामाबाबत जाब विचारला असता संबंधित ठेकेदारांकडून जिवे मारण्याच्या धमक्या दिल्या जात असल्याचा गंभीर आरोपही तक्रारदारांनी केला आहे. यापूर्वी स्थानिक आझाद नगर पोलीस ठाण्यात तक्रार करूनही दाद न मिळाल्याने, आता थेट पोलीस अधीक्षकांना निवेदन देत संबंधित ठेकेदारांवर फसवणुकीचा गुन्हा दाखल करून त्यांच्यावर कडक कायदेशीर कारवाई करावी, अशी मागणी त्रस्त जवान आणि नागरिकांनी केली आहे.

पारोळा रोडवर भीषण अपघात ; वरखेडे गावातील तिघांचा जागीच मृत्यू

 पारोळा रोडवर भीषण अपघात ; वरखेडे गावातील तिघांचा जागीच मृत्यू 

 परिसरात शोककळा, पोलिसांचा तपास सुरू 

जनसंघर्ष न्यूज 

धुळे - पारोळा रोडवरील नक्षत्र लॉन्स जवळ लक्झरी बसच्या धडकेत झालेल्या भीषण अपघातात वरखेडे गावातील तिघांचा दुर्दैवी मृत्यू झाला. अपघात इतका भयानक होता की घटनास्थळीच तिघांनी प्राण गमावले. या दुर्घटनेमुळे वरखेडे गावासह धुळे शहरात शोककळा पसरली आहे.

मृतांमध्ये दोन पुरुष व एका महिलेचा समावेश असून ते सर्व वरखेडे गावातील रहिवासी असल्याची प्राथमिक माहिती समोर आली आहे. अपघातानंतर स्थानिक नागरिकांनी तातडीने मदतकार्य सुरू केले. पोलिसांनी घटनास्थळी धाव घेत पंचनामा करून मृतदेह शवविच्छेदनासाठी पाठवले असून पोलीस अधिक तपास करत आहेत. अपघातामुळे काही काळ वाहतूक विस्कळीत झाली होती.

धुळ्यात भुमाफियांचा हौदोस बेकायदेशीर खरेदी करून जमीन हडप करण्याचे प्रयत्न - जयेश आबा बागुल

 

धुळ्यात भुमाफियांचा हौदोस बेकायदेशीर खरेदी करून जमीन हडप करण्याचे प्रयत्न - जयेश आबा बागुल 

एकाच प्लॉटची दोन वेळा विक्री मालकी हक्क वादाला नवे वळण ; बेकायदेशीर व्यवहाराचा झाल्याचा संशय 

जयेश आबा बागुल यांचे पत्रकार परिषदेत गंभीर आरोप

जनसंघर्ष न्यूज 

धुळे :- देवपूर येथील प्लॉट मालकी हक्क व कथित बेकायदेशीर खरेदी-विक्री प्रकरणी धुळे जिल्हा मराठी पत्रकार भवनात पत्रकार परिषद घेण्यात आली. यावेळी जयेश आबा बागुल यांनी संबंधित प्रकरणाची सविस्तर माहिती देत न्याय मिळवून देण्याची मागणी प्रशासनाकडे केली.

  पत्रकार परिषदेत बोलताना जयेश बागुल यांनी सांगितले की, देवपूर येथील सिटी सर्व्हे क्रमांक २०६५ असलेला प्लॉट त्यांच्या आई स्व. भारती आबा बागुल यांनी १९८९ मध्ये कायदेशीररीत्या खरेदी केला होता. त्यानंतर फेरफार नोंदीनुसार त्यांच्या आईचे नाव अभिलेखात दाखल झाले होते. आईच्या निधनानंतर कायदेशीर वारस म्हणून त्यांचे नाव सिटी सर्व्हे नोंदीत समाविष्ट करण्यात आले असल्याचे त्यांनी सांगितले.मात्र, कोणतीही पूर्वसूचना अथवा नोटीस न देता संबंधित मिळकतीवर इतर व्यक्तींची नावे नोंदविण्यात आल्याचा आरोप त्यांनी केला. माहिती अधिकारांतर्गत माहिती मागवूनही ती देण्यात आली नसल्याचा दावा करत संबंधित अधिकारी आणि कर्मचाऱ्यांच्या भूमिकेची चौकशी करण्याची मागणी त्यांनी केली.

तसेच, संबंधित प्लॉटची बेकायदेशीररीत्या खरेदी-विक्री करण्यात आल्याचा आरोप करत या व्यवहाराविरोधात जिल्हा अधीक्षक भूमी अभिलेख कार्यालयाकडे अपील दाखल केल्याची माहिती त्यांनी दिली. प्रकरण न्यायप्रविष्ट असताना प्रशांत लोटन सनेर व रणजितसिंग साहेबराव राजपुत व प्लॉटवर येऊन धमकी देत सामान हटविण्याचा प्रयत्न केल्याचाही आरोप त्यांनी केला. यासंदर्भात देवपूर पोलीस ठाण्यात अदखलपात्र गुन्ह्याची नोंद करण्यात आल्याचे त्यांनी स्पष्ट केले.

या संपूर्ण प्रकरणाची निष्पक्ष चौकशी करून दोषींवर कठोर कारवाई करण्यात यावी तसेच आपल्या कुटुंबाला न्याय मिळावा, अशी मागणी जयेश बागुल यांनी पत्रकार परिषदेतून केली.

सदर प्लॉटवर प्रशांत सनेर व रणजीत सिंग साहेबराव राजपूत येऊन धमकी देत सामान आठवण्याचा प्रयत्न करताना आम्ही पोलिसांना 112 नंबर वर फोन करून गाडी बनवली असल्यास तेथे पोलिसांना देखील गम करण्यात आलं की बॉबी येत आहे तुम्ही आत्ताच्या आत्ता निघून जा नाहीतर तुमचं काही खरं नाही असे धमकविले असल्याचे जयेश बागुल यांच्या मावशीने पत्रकार परिषद आरोप केले आहे.

आम्ही अनेक वेळा भूमी अभिलेख येथे आमच्या प्लॉटचे नोंदी व कागदपत्र काढण्यासाठी गेलो असता तिथे आम्हाला उडवा उडवीचे उत्तर देत सांगितले जाते की आपल्या प्लॉटचे आमच्या कार्यालयात एकही कागदपत्र नाही कागदपत्र गहाळ झाले आहेत व बाकी कागदपत्र कुजलेल्या अवस्थेत आहे त्यामुळे आम्ही तुम्हाला कागदपत्र देऊ शकत नाही असे सांगून धुडकावून लावले जाते असे पत्रकार परिषदेत जयेश बागुल यांनी सांगितले.

निकुंभे गावात ग्रामस्थाची हत्या; आरोपी कुटुंबाला हद्दपार करण्याची गावकऱ्यांची मागणी

निकुंभे गावात ग्रामस्थाची हत्या; आरोपी कुटुंबाला हद्दपार करण्याची गावकऱ्यांची मागणी

जनसंघर्ष न्यूज 

धुळे - जिल्ह्यातील निकुंभे येथे शानाभाऊ शंभू पाटील या ग्रामस्थाची हत्या झाल्याची धक्कादायक घटना समोर आली आहे. ८ जून रोजी शानाभाऊ पाटील यांच्यावर गावातीलच दशरथ किसन ठाकरे याने पाठीमागून लोखंडी रॉडने प्राणघातक हल्ला केल्याचा आरोप आहे. या हल्ल्यात गंभीर जखमी झालेल्या पाटील यांचा दुसऱ्या दिवशी, ९ जून रोजी उपचारादरम्यान मृत्यू झाला. या घटनेच्या तीव्र निषेधार्थ निकुंभे गावातील संतप्त ग्रामस्थांनी आज धुळ्याचे पोलीस अधीक्षक कार्यालय गाठून प्रशासनाला निवेदन दिले आहे.

आरोपी आणि त्याच्या संपूर्ण कुटुंबाची गुन्हेगारी पार्श्वभूमी असून, गेल्या अनेक वर्षांपासून त्यांनी गावात दहशत माजवली असल्याचा दावा ग्रामस्थांनी केला आहे. शेतातील साहित्याच्या चोऱ्या करणे, दमदाटी करणे आणि खोटे आरोप करून त्रास देणे, असे प्रकार या कुटुंबाकडून होत असल्याच्या तक्रारी निवेदनात नमूद आहेत. या गुन्हेगारीला कंटाळून, मुख्य आरोपीला कठोर शिक्षा व्हावी आणि त्याच्या संपूर्ण कुटुंबाला कायमस्वरूपी जिल्ह्यातून हद्दपार करावे, अशी आक्रमक मागणी ग्रामस्थांनी केली आहे. योग्य कारवाई न झाल्यास गावातील शांतता धोक्यात येऊ शकते, असेही निवेदनात स्पष्ट करण्यात आले आहे.

उपवर्गीकरणातून आरक्षण संपविण्याचा डाव , आगीशी खेळू नका , पॅंथर सेनेचा केंद्र,राज्य सरकारला इशारा.

उपवर्गीकरणातून आरक्षण संपविण्याचा डाव , आगीशी खेळू नका - पॅंथर सेनेचा केंद्र,राज्य सरकारला इशारा.

जनसंघर्ष न्यूज 

 धुळे - अनुसूचित जाती आरक्षणाच्या उपवर्गीकरणातून समाजामध्ये फूट पाडण्याचे काम केले जात आहे. आरक्षण संपविण्याचा हा डाव आगीशी खेळू नका.आमच्याकडे गमविण्यासारखे काहीच नाही , असा इशारा ऑल इंडिया पॅंथर सेनेचे राष्ट्रीय अध्यक्ष दीपक केदार यांनी दिला आहे. ऑल इंडिया पॅंथर सेनेची आरक्षण बचाव यात्रा धुळ्यात आली आहे. रेस्ट हाऊस येथून ही यात्रा पोलिस अधीक्षक कार्यालयमार्गे  डॉ . बाबासाहेब आंबेडकर स्मारकापर्यंत आली.तेथे डॉ. आंबेडकरांना अभिवादन करण्यात आले.यावेळी माध्यमांशी संवाद साधताना दीपक केदार म्हणाले की भारतीय संविधानाने दिलेले आरक्षण हे सामाजिक न्यायाचे साधन आहे.परंतु सद्या देशात संविधानिक हक्क, सामाजिक हक्क,अनुसुचित जाती,जमातीच्या आरक्षण व्यवस्थेवर विविध प्रकारचे संकट निर्माण होत असल्याची भावना जनतेत निर्माण झाली आहे.अनुसुचित जातीच्या आरक्षणाच्या उपवर्गीकरणाच्या  माध्यमातून अनुसुचित जातींमध्ये फूट पडण्याचा प्रयत्न केला जात आहे.त्यामुळे हे उपवर्गीकरण तात्काळ रद्द करण्यात यावे.शाहिद सोमनाथ सूर्यवंशी यांच्या मारेकऱ्यांना फाशीची शिक्षा द्यावी .त्यासाठी खटला जलदगती न्यायालयामार्फत चालविण्यात यावा.लोकशाही प्रकियेवर जनतेचा विश्वास अधिकदृढ होण्यासाठी ईव्हीएम मशीन ऐवजी बॅलेट पेपरवर निवडणुका  घेण्यात याव्यात. बुद्धगया महाविहाराचा ताबा बौद्ध समाजाकडे देण्यात यावा, अशा मागण्यांसाठी ही यात्रा काढण्यात आल्याचे राष्ट्रीय अध्यक्ष दीपक केदार म्हणाले , विविध सामाजिक प्रश्नांवर शासनाने तातडीने सकारात्मक भूमिका घ्यावी.अन्यथा राज्यभर  तीव्र आंदोलन करण्यात येईल. असा इशारा त्यांनी दिला. आरक्षण बचाव यात्रेत राष्ट्रीय अध्यक्ष दीपक केदार यांच्यासोबत महाराष्ट्राचे अध्यक्ष विनोद भोळे ,धुळे जिल्हाध्यक्ष सागर मोहिते,प्रविण शिंदे,विशाल वाघ, कृष्णा पारधी, सतिष पाटील ,रत्नशील सोनवणे, दीपक वाडीले, गणेश वाघ, निलेश इंदवे , अशोक करंजे,युवराज बाविस्कर ,आबा अमृतसागर ,बंटी मगरे,शुभम समाधीर, दादा सोनवणे , सम्राट देवरे,पूजा चव्हाण ,ललिता जाधव,गौरव गवळी , यशवंत दुसाणे , राहुल वाघ,नितीन  म्हसदे , सागर चव्हाण, छोटू बैसाणे, कुणाल बैसाणे, अशपाक शेख, अताऊर रेहमान,वंदना बागुल,अविनाश बागुल,महेंद्र महाले,गौतम पगारे,भाऊसाहेब बळसाने, यांच्यासह मोठ्या संख्येने धुळेकर नागरिक सहभागी झाले होते.

२५ वर्षाच्या न्यायालयीन लढ्याला यला यश ; लाडशाखीय वाणी समाजाची इमारत परत मिळाल्याने समाजात आनंदाचे वातावरण

 २५ वर्षाच्या न्यायालयीन लढ्याला यला यश ; लाडशाखीय वाणी समाजाची इमारत परत मिळाल्याने समाजात आनंदाचे वातावरण

जनसंघर्ष न्यूज 

धुळे : श्री लाडशाखीय वाणी समाज संस्था, धुळे यांच्या मालकीची गट नं. ४ येथील सिटी सर्व्हे नं. १३१९ ही इमारत तब्बल २५ वर्षांच्या न्यायालयीन लढाईनंतर पुन्हा संस्थेच्या ताब्यात आली आहे. मुंबई उच्च न्यायालयाचे छत्रपती संभाजीनगर खंडपीठ तसेच सर्वोच्च न्यायालयाच्या आदेशानुसार संस्थेच्या विश्वस्तांनी पोलिस प्रशासनाच्या उपस्थितीत मालमत्तेचा ताबा घेतल्याची माहिती श्री लाडशाखीय वाणी समाज संस्थेचे अध्यक्ष राजाराम वाणी यांनी पत्रकार परिषदेत दिली. दरम्यान ही मिळकत विक्री करून मोहाडीत संस्थेच्या साडेपाच एकर जमिनीवर मंगल कार्यालय आणि वाणी समाजबांधवांसाठी वसतीगृह निर्माण करण्यात येणार असल्याचे त्यांनी सांगितले.

धुळे जिल्हा मराठी पत्रकार संघाच्या साक्री रोडवरील सभागृहात आयोजित पत्र परिषदेत बोलतांना संस्थेचे अध्यक्ष राजाराम वाणी यांनी सांगितले की, १९७२ पासून ही तीन मजली इमारत संस्थेच्या मालकीची आहे. सन २००१ मध्ये तत्कालीन पदाधिकाऱ्यांनी धर्मादाय आयुक्तांची परवानगी न घेता ही मालमत्ता अरुण सोनीराम शिनकर व सौ. सविता अरुण शिनकर यांना देण्याचा प्रयत्न केल्याचा आरोप करण्यात आला होता. या व्यवहाराविरोधात समाजातील अनेक सदस्यांनी आक्षेप घेतला होता. अशोक पाटकर यांच्या पुढाकाराने समाजबांधवांनी या प्रकरणाचा पाठपुरावा केला. सहधर्मादाय आयुक्तांनी ३० ऑक्टोबर २००७ रोजी विक्री परवानगीचा अर्ज फेटाळून लावत मालमत्तेचा ताबा संस्थेकडे देण्याचे आदेश दिले. त्यानंतर हे प्रकरण उच्च न्यायालय व सवों च्च न्यायालयात गेले. अखेरीस उच्च न्यायालयाने ४ मे २०२६ रोजी याचिका नामंजूर करून सहधर्मादाय आयुक्तांचा आदेश कायम ठेवला. त्यानंतर सर्वोच्च न्यायालयानेही शिनकर दाम्पत्याची एसएलपी फेटाळली. न्यायालयीन प्रक्रिया पूर्ण झाल्यानंतर संस्थेने कायदेशीररित्या मालमत्तेचा ताबा घेतला. यावेळी अध्यक्ष राजाराम वाणी, उपाध्यक्ष वसंत देव, सचिव प्रा.डी.व्ही. कोठावदे, कार्याध्यक्ष अशोक पाटकर, खजिनदार जगदीश खैरनार यांच्यासह विश्वस्त व समाजबांधव उपस्थित होते. या यशाबद्दल संस्थेचे पदाधिकारी आणि विश्वस्तांचे समाजातून कौतूक करण्यात येत असून समाजात आनंदाचे वातावरण निर्माण झाले आहे.

धुळ्यात महिला अत्याचाराविरोधात 'जन आक्रोश मोर्चा'; पोलिसांच्या दिरंगाईचा निषेध करत जिल्हाधिकारी कार्यालयावर धडक

धुळ्यात महिला अत्याचाराविरोधात 'जन आक्रोश मोर्चा ; पोलिसांच्या दिरंगाईचा निषेध करत जिल्हाधिकारी कार्यालयावर धडक

जनसंघर्ष न्यूज 

धुळे -  शहरातील साक्री रोड फुले नगर परिसरातील संतप्त महिलांनी महिला अत्याचाराविरोधात आणि पोलीस प्रशासनाच्या निषेधार्थ 'जन आक्रोश मोर्चा' काढत थेट जिल्हाधिकारी कार्यालयावर धडक दिली. या मोर्चामध्ये शेकडो महिला आणि नागरिक रस्त्यावर उतरल्याचे पाहायला मिळाले. महिलांवरील वाढते अत्याचार आणि पोलिसांची बघ्याची भूमिका याविरुद्ध मोर्चेकरी महिलांनी आपला तीव्र संताप व्यक्त करत प्रशासनाचा जाहीर निषेध केला.

शहरातील एका महिलेसमोर तिच्या शेजारी राहणाऱ्या विकृताने अश्लील कृत्य केल्याचा धक्कादायक प्रकार ५ जून रोजी घडला होता. मात्र, या प्रकरणातील आरोपीचे नातेवाईक पोलीस दलात कार्यरत असल्याने धुळे शहर पोलिसांनी फिर्याद नोंदवून घेण्यास तब्बल ४८ तासांचा जाणीवपूर्वक विलंब केला आणि आरोपीला पाठीशी घालण्याचा प्रयत्न केला. पोलिसांच्या या एकतर्फी आणि बेजबाबदार कारभारामुळे संतप्त झालेल्या नागरिकांनी रस्त्यावर उतरून मुख्य आरोपीवर तात्काळ कडक कारवाई व्हावी आणि त्याला पाठीशी घालणाऱ्या संबंधित पोलीस अधिकाऱ्यांवर तातडीने निलंबनाची कारवाई करावी, अशी आग्रही मागणी केली आहे. प्रशासनाने त्वरित न्याय न दिल्यास आंदोलन अधिक तीव्र करण्याचा इशारा या संतप्त महिलांनी दिला आहे.

'आमची शेती वाहून गेली, आता जीवही द्यायचा का?'; उडाणे-गोताणे येथील शेतकऱ्यांचा टाहो, कॅनॉलची दुरुस्ती न झाल्यास जिल्हाधिकारी कार्यालयातच आत्मदहनाचा इशारा!

'आमची शेती वाहून गेली, आता जीवही द्यायचा का ? ; उडाणे-गोताणे येथील शेतकऱ्यांचा टाहो, कॅनॉलची दुरुस्ती न झाल्यास जिल्हाधिकारी कार्यालयातच आत्मदहनाचा इशारा!

 जनसंघर्ष न्यूज 

​धुळे - तालुक्यातील गोताणे आणि उडाणे या गावांमध्ये सध्या एक अस्मानी नव्हे, तर प्रशासकीय दुर्लक्षाचे सुलतानी संकट कोसळले आहे. गावातून जाणाऱ्या एक्सप्रेस कॅनॉलला दोन ठिकाणी मोठे भगदाड पडल्याने, कालव्याचे पाणी थेट नागरिकांच्या घरात आणि तब्बल अडीचशे हेक्टर सुपीक शेतजमिनीत घुसले आहे. हातातोंडाशी आलेला खरिपाचा घास हिरावला गेला असून, शेकडो शेतकरी कुटुंबांचे आर्थिक कंबरडे मोडले आहे. एकीकडे पिके पाण्याखाली सडत आहेत, तर दुसरीकडे घरात पाणी शिरल्याने गावकऱ्यांचे जनजीवन विस्कळीत झाले आहे. या उध्वस्त झालेल्या संसाराची आणि शेतीची साधी पाहणी करण्याची तसदीही पाटबंधारे विभागाच्या अधिकाऱ्यांनी न घेतल्याने, बळीराजाच्या डोळ्यांतील अश्रूंचा आता तीव्र संतापात उद्रेक झाला आहे.

​प्रशासनाच्या या अमानवीय व असंवेदनशील दुर्लक्षाला कंटाळून, अखेर हताश झालेल्या शेतकऱ्यांनी माजी जि.प. सभापती संग्राम पाटील यांच्या नेतृत्वाखाली धुळे जिल्हाधिकारी कार्यालयावर धडक दिली आणि आपल्या व्यथा निवेदनाद्वारे मांडल्या. या निवेदनात त्यांनी सर्व कायदेशीर बाबींची पूर्तता करत कॅनॉलची तातडीने व कायमस्वरूपी सुरक्षित दुरुस्ती करण्याची आणि निष्काळजी अधिकाऱ्यांवर कारवाईची आर्त मागणी केली आहे. "आमच्या मागण्यांची त्वरित दखल न घेतल्यास, आम्हाला न्याय मिळवण्यासाठी जिल्हाधिकाऱ्यांच्याच दालनात अंगावर पेट्रोल ओतून आत्मदहन करण्याशिवाय दुसरा कोणताही मार्ग उरणार नाही," असा अत्यंत वेदनादायी आणि आक्रमक इशारा या शेतकऱ्यांनी दिला आहे.